Bu günlərdə Azərbaycan Milli Konservatoriyasının "Muğam (xanəndə)" kafedrasının baş müəllimi, Xalq artisti Zabit Nəbizadənin tələbələri ilə məşq prosesini əks etdirən videogörüntülərə baxarkən bir daha əmin olursan ki, əsl sənətkar üçün fəsillərin fərqi yoxdur. Yay tətili insanların çoxu üçün istirahət dövrü olsa da, sənətə könül verən müəllim üçün ən böyük istirahət yetişdirdiyi tələbələrin uğurunu görməkdir.

İllərdir muğam sənətini böyük məsuliyyət və peşəkarlıqla yaşadan Zabit Nəbizadə yalnız qüdrətli xanəndə deyil, həm də Azərbaycan musiqisinin gələcəyini formalaşdıran fədakar pedaqoqlardandır. Onun ifasında səslənən muğamlar milli musiqimizin zənginliyini dünyaya nümayiş etdirirsə, auditoriyadakı fəaliyyəti həmin zəngin irsin etibarlı əllərdə gələcəyə daşınmasının təminatıdır. 2000-ci ildən pedaqoji fəaliyyət göstərən, 2003-cü ildən Azərbaycan Milli Konservatoriyasında dərs deyən ustad sənətkar bu gün də eyni məsuliyyət, eyni həvəs və eyni sevgiylə gənc xanəndələr yetişdirir.

Muğam yalnız notlar toplusu deyil. O, xalqın tarixi yaddaşı, milli kimliyi, mənəviyyatı və ruhudur. Bu ruhu qorumaq isə yalnız istedadla deyil, həm də yüksək müəllim məsuliyyəti, səbir və sonsuz fədakarlıqla mümkündür. Zabit müəllimin hər məşqi, hər tövsiyəsi, hər ifası tələbələr üçün sadəcə dərs deyil, əsl həyat məktəbi, milli dəyərlər dərsidir.

Son dövrlərdə Azərbaycan Milli Konservatoriyasında hiss olunan müsbət dəyişikliklər bu müqəddəs missiyanın daha geniş vüsət aldığını göstərir. Konservatoriyaya yeni rektor təyin olunan Kamilə Dadaş-zadənin rəhbərliyi ilə təhsil ocağında elmi yaradıcılığın, milli musiqiyə diqqətin və sağlam akademik mühitin daha da güclənməsi diqqətdən yayınmır. Bu dəyişikliklər təkcə inzibati idarəetmədə deyil, həm də yaradıcı mühitin canlanmasında, müəllim və tələbələr arasında qarşılıqlı etimadın möhkəmlənməsində özünü göstərir.

Kamilə Dadaş-zadə bu vəzifəyə gəlməzdən əvvəl də musiqişünas-alim kimi zəngin elmi fəaliyyəti, Azərbaycan musiqi mədəniyyətinin araşdırılması istiqamətində apardığı tədqiqatlar, pedaqoji fəaliyyəti və milli musiqimizin təbliği sahəsindəki xidmətləri ilə tanınan ziyalılardan olub. Onun elmi dünyagörüşü ilə idarəçilik bacarığının vəhdəti bu gün Konservatoriyanın inkişafında yeni mərhələnin əsasını təşkil edir. Mədəniyyət sahəsini yalnız idarə etmək deyil, onu dərindən anlamaq, yaşamaq və qorumaq bacarığı məhz belə rəhbərlərdə öz əksini tapır.

Ötən il Kamilə xanımla yaxından tanış olmaq imkanım oldu. Açığını etiraf etməliyəm ki, bu görüş məndə dərin və xoş təəssürat yaratdı. İllərdir müxtəlif rəhbər vəzifələrdə çalışan insanlarla ünsiyyətdə olmuşam. Təəssüf ki, bəzən vəzifə insanın xarakterini dəyişir, onu sərtləşdirir, hətta insanlardan uzaq salır. Lakin Kamilə xanımda bunun tam əksini gördüm.

Onun simasında yüksək intellekti, zəngin elmi dünyagörüşünü, səmimiyyəti, insanpərvərliyi, vətənpərvərliyi, etik davranışı və əsl Azərbaycan xanımına məxsus ləyaqəti gördüm. Onun təvazökarlığı, danışıq mədəniyyəti, insanlara münasibəti və nəcib davranışı istər-istəməz tariximizin adını ehtiramla çəkdiyimiz maarifçi və ziyalı Azərbaycan xanımlarını xatırladır. Belə ziyalı xanımlar cəmiyyət üçün yalnız rəhbər deyil, həm də mənəvi örnəkdir.

Bəzən mədəniyyət sahəsinə elə insanlar rəhbər təyin olunur ki, mədəniyyətin mahiyyətini, onun milli dövlətçilik üçün daşıdığı əhəmiyyəti dərindən dərk etmirlər. Bu isə təbii ki, milli irsin inkişafına da mənfi təsir göstərir. Sevindirici haldır ki, Azərbaycan Milli Konservatoriyasında bu gün mədəniyyəti dərindən bilən, elmi təfəkkürü, milli düşüncəsi və yüksək mənəvi keyfiyyətləri ilə seçilən bir ziyalı rəhbərlik edir. İçimdən keçən ən səmimi arzulardan biri də budur ki, dövlətimizin mədəniyyət və təhsil sahələrində rəhbərlik edən bütün insanlar məhz belə yüksək insani və peşəkar keyfiyyətlərə malik olsunlar.

Bu gün Konservatoriyada müşahidə olunan yaradıcı ab-hava, müəllim əməyinə verilən dəyər, tələbələrin inkişafına göstərilən diqqət və milli musiqimizin gələcəyinə yönəlmiş fəaliyyətlər ölkəmizin mədəni siyasətinin uğurlu istiqamətlərindən xəbər verir. Belə bir mühitdə Zabit Nəbizadə kimi ustad sənətkarların yorulmadan fəaliyyət göstərməsi isə Azərbaycan muğam məktəbinin sabahına olan inamı daha da artırır.

Milli musiqimiz yalnız səhnələrdə deyil, auditoriyalarda, məşq otaqlarında, müəllimin nəfəsində, tələbənin səsində yaşayır. Bu gün Azərbaycan Milli Konservatoriyasında formalaşan sağlam yaradıcı mühit, ustad sənətkarların yorulmaz fəaliyyəti və elmi-intellektual rəhbərliyin vəhdəti göstərir ki, milli musiqimizin gələcəyi etibarlı əllərdədir.