“İran memorandum üzrə sözlərinə yox, əməllərinə görə qiymətləndiriləcək”.

Zekainfo.az xəbər verir ki, bunu ABŞ-nin Vitse-prezidenti Ceyms Devid Vens “CBN News”a müsahibəsində deyib.

O, İranla imzalanan Anlaşma Memorandumunun əsas prinsipinin tərəflərin bəyanatları deyil, real addımları olduğunu bildirib.

Vens deyib ki, İranın yeni rəhbərliyi verdiyi vədlərə deyil, atacağı konkret addımlara əsasən qiymətləndiriləcək.

“Bu Anlaşma Memorandumunun yaxşı tərəfi odur ki, o, sözlərlə deyil, onların davranışları ilə bağlıdır”, – deyə ABŞ Vitse-prezidenti vurğulayıb.

Vens qeyd edib ki, Prezident Donald Tramp və administrasiya üçün əsas narahatlıqlardan biri əvvəlki İran hakimiyyəti dövründə etirazçıların qətlə yetirilməsi olub.

“Həmin insanlar artıq hakimiyyətdə deyillər. İndi görəcəyik ki, yeni rəhbərlik xalqa fərqli münasibət göstərəcəkmi?! Ümid edirik ki, belə olacaq. Əgər belə olmazsa, bunu onların konkret davranışlarından görəcəyik. Məhz buna görə də deyirəm ki, bu memorandumun üstün cəhəti sözlərə deyil, əməllərə əsaslanmasıdır”, – deyə Vens bildirib.