Azərbaycan xalqının müasir tarixində mühüm yer tutan 15 İyun – Milli Qurtuluş Günü dövlətçilik tariximizin ən əlamətdar səhifələrindən biridir. Bu tarix təkcə siyasi hadisə deyil, həm də Azərbaycanın müstəqilliyinin qorunması, dövlətçiliyin möhkəmləndirilməsi və xalqın gələcəyinin təmin olunması baxımından xüsusi əhəmiyyət daşıyır.

1990-cı illərin əvvəllərində Azərbaycan mürəkkəb ictimai-siyasi proseslərlə üz-üzə qalmışdı. Ölkədə hökm sürən siyasi qeyri-sabitlik, idarəetmədə yaranmış böhran və vətəndaş qarşıdurması təhlükəsi dövlət müstəqilliyini ciddi sınaq qarşısında qoymuşdu. Belə bir ağır şəraitdə xalqın təkidli tələbi ilə Ümummilli Lider Heydər Əliyev yenidən siyasi hakimiyyətə qayıtdı və 1993-cü il iyunun 15-də Azərbaycan Ali Sovetinin Sədri seçildi.

Məhz bu tarixi dönüş nöqtəsindən sonra ölkədə sabitliyin bərpası, dövlət institutlarının möhkəmləndirilməsi və milli həmrəyliyin təmin olunması istiqamətində mühüm addımlar atıldı. Azərbaycan parçalanmaq və müstəqilliyini itirmək təhlükəsindən xilas oldu, gələcək inkişafın təməli qoyuldu.

Bu gün Milli Qurtuluş Günü Azərbaycan xalqının birlik, dövlətçilik və milli iradə rəmzi kimi qeyd edilir. Ulu Öndər Heydər Əliyevin uzaqgörən siyasəti nəticəsində əsası qoyulan inkişaf strategiyası sonrakı illərdə ölkəmizin hərtərəfli tərəqqisinə, beynəlxalq nüfuzunun artmasına və müstəqilliyinin daha da möhkəmlənməsinə şərait yaratdı.

15 İyun tarixə Azərbaycan dövlətçiliyinin xilası, xalqın öz taleyinə sahib çıxması və sabaha inamın bərpa olunduğu gün kimi həkk olunub. Bu əlamətdar gün hər bir azərbaycanlı üçün dövlətə sədaqətin, milli birliyin və müstəqillik dəyərlərinə hörmətin təcəssümüdür.

Milli Qurtuluş Günümüz mübarək!