Şou biznes
20:55, 18 Avqust 2026
Bəzi səslər var ki, insan onları sadəcə eşitmir, ürəyi ilə dinləyir. Canseverin səsi də belə səslərdən idi. Onun 8 avqust 2026-cı ildə 59 yaşında vəfat etməsi təkcə Türkiyə musiqi aləmi üçün deyil, onu sevən bütün Türk dünyası üçün ağır itkidir. Uzun müddət lösemi ilə mübarizə aparan sənətçi Almaniyada müalicə olunurdu; mart ayında ilik transplantasiyası keçirsə də, xəstəlik qarşısında həyatını xilas etmək mümkün olmadı.
Əsl adı Dzansever Dalipova olan Canseverin həyatı elə uşaqlıqdan sınaqlarla başlayıb. Şimali Makedoniyanın Veles şəhərində yeddi uşaqlı ailənin ən kiçiyi kimi dünyaya gələn sənətçi 12 yaşında bədbəxt hadisə nəticəsində bir gözünü itirib. Lakin həyat onun gözündən birinin işığını alsa da, ürəyindəki sənət işığını söndürə bilməyib.
Gənc yaşlarında ağır xəstəliklə mübarizə aparan Cansever bütün bu ağrılara baxmayaraq musiqidən ayrılmadı. Onun səsindəki yanğı, nisgil və kövrəklik, bəlkə də, elə yaşadığı həyatın izləri idi. O, öz dərdini mahnıya, göz yaşını sənətə çevirdi.
Canseverin Türkiyədə tanınmasında İbrahim Tatlısesin “İbo Show” proqramında onun sənətinə meydan açması mühüm rol oynadı. “Kara Çadır” ifası ilə diqqət çəkən Cansever sonralar özünəməxsus səsi və ifa tərzi ilə geniş dinləyici auditoriyasının sevgisini qazandı. “Ağla Gözbebeğim”, “Sen de Gittin”, “Kime Bu İnat” və digər mahnıları 90-cı illərin musiqi yaddaşında silinməz iz buraxdı.
Onun taleyində qəribə bir ağrı vardı: milyonlarla insanın qarşısında sevilən, alqışlanan sənətçi olsa da, şəxsi həyatında çox ağır sınaqlardan keçdi. Bir gözünü uşaqlıqda itirdi, xəstəliklərlə mübarizə apardı, sənət yolunda haqqsızlıqlar yaşadı, lakin bütün bunlara rəğmən səhnədən və dinləyicisindən üz döndərmədi.
Ömrünün son sınağı isə lösemi oldu. Müalicə, kimyaterapiya, ilik transplantasiyası və uzun xəstəlik mübarizəsi... Cansever son günlərinə qədər həyata ümidlə bağlandı. Onun xəstəxanadan paylaşdığı müraciətlərində belə insanlardan dua istəməsi bir sənətkarın deyil, həyata sarılmaq istəyən bir insanın fəryadı idi.
İndi həmin səs susub...
Amma Canseverin oxuduğu mahnılar susmayacaq. Çünki əsl sənətkarın ömrü onun yaşadığı illərlə ölçülmür. Onun ömrü insanların yaddaşında, mahnılarında, xatirələrində davam edir.
Canseverin həyatı bizə bir həqiqəti xatırladır: insan bəzən taleyin qarşısında çox şey itirə bilər, amma ürəyindəki sənəti qoruyub saxlaya bilirsə, məğlub olmur.
O, ağrıları ilə yaşadı, ağrılarını oxudu və nəhayət, öz səsini milyonların yaddaşına əmanət edib getdi.
Qardaş Türkiyənin sevilən sənətkarı Canseverin vəfatı münasibətilə onun ailəsinə, yaxınlarına, sənət dostlarına və bütün Türk musiqisevərlərinə Azərbaycandan dərin hüznlə başsağlığı veririk.
Ruhu şad, məkanı cənnət olsun.
Canseverin səsi isə bundan sonra da onun sevənlərinin qəlbində yaşayacaq.
